Програмата на Владата за оваа година предвидува седум мерки за кои се одвоени 52 милиони денари
Владата, на денешната седница, ја усвои Програмата за промоција на обновливите извори на енергија и поттикнување енергетската ефикасност во домаќинствата за 2021 година.
Предвидено е средствата од дел 1 на оваа програма, во вкупен износ од 52 милиони денари, да се користат за следните мерки:
1. Надоместување на дел од трошоците за купени и вградени сончеви термални колекторски системи во домаќинствата до 30%, но не повеќе од 10 000 денари по домаќинство за 2021 година, во вкупен износ од 6 000 000 денари;
2. Надоместување на дел од трошоците за купени и вградени сончеви термални колекторски системи во домаќинствата до 70%, но не повеќе од 15 000 денари по домаќинство за 2021 година, во вкупен износ од 2 000 000 денари за лица со ниски примања;
3. Надоместување на дел од трошоците за купени и вградени ПВЦ или алуминиумски прозорци во домаќинствата до 50%, но не повеќе од 20 000 денари по домаќинство за 2021 година, во вкупен износ од 19 000000 денари;
4. Надоместување на дел од трошоците за купени и вградени ПВЦ или алуминиумски прозорци во домаќинствата до 70%, но не повеќе од 25 000 денари по домаќинство за 2021 година, во вкупен износ од 3 000 000 денари за категоријата на лица со ниски примања;
5. Надоместување на дел од трошоците за купување и вградување на печки на пелети во домаќинствата до 50%, но не повеќе од 20 000 денари по домаќинство за 2021 година, во вкупен износ од 11 000 000 денари;
6. Надоместување на дел од трошоците за купување печки на пелети во домаќинствата до 70%, но не повеќе од 25 000 денари по домаќинство за 2021 година, во вкупен износ од 3 000 000 денари за категоријата на лица со ниски примања;
7. Надоместување на дел од трошоците за купување и инсталирање на фотонапонски панели за производство на електрична енергија до 4 kW за сопствена потрошувачка за домаќинствата, на градба на која има право на сопственост или користење, до 30%, но не повеќе од 62 000 денари по домаќинство за 2021 година, во вкупен износ од 8 000 000 денари.
Корисници на оваа програма во категоријата на лица со ниски примања се:
а) Лицата со ниски примања кои се вработени или е вработен едниот брачен другар, а нивните месечни примања во семејството не надминуваат нето приход од 30 000 денари;
б) Лицата со ниски примања кои се пензионери или едниот брачен другар е пензионер и нивните месечни примања во семејството не надминуваат нето приход од 20 000 денари;
в) Ранливи потрошувачи како што се дефинирани во Програмата за заштита на ранливи потрошувачи на енергија за 2021 година.
Надоместокот на дел од средствата од дел 2 од оваа програма, како што информираа од Владата, ќе го остварат лица кои досега не користеле средства од буџетот за вакви мерки.
