Не се бираат средства во обид да се добие атрактивниот тендер за Универзален снабдувач. Јавниот повик за Универзален снабдувач на електрична енергија за домаќинствата и малите потрошувачи, уште не е завршен, но во медиумите се шират дезинформации за останатите компании кои изразија интерес за учество на тендерот.
Во насока да се дискредитира еден од најсериозните учесниците на јавниот повик- ЕДС, се пласираат информации дека од компанијата побарале измени во јавниот повик за Универзален снабдувач. Информацијата беше експресно демантирана од раководството на ЕДС, а од компанијата уште на почетокот на јавниот повик информираа дека ќе понудат далеку пониска маржа од сегашната, што пак ќе значи и пониска цена на електрична енергија за граѓаните.
„Не е точна информацијата дека сме барале било какви измени во условите на повикот. ЕДС планира да учествува на повикот, и планира да се натпреварува со исклучително конкурентна понуда, односно значително намалена маржа, што би резултирало со пониски сметки за крајните корисници. Поради правните ограничувања, не сме во можност да ја споделиме содржината на нашата жалба до комисијата, но можеме да споделиме дека во основа, таа се однесува на можноста повикот да биде незаконски ограничувачки, односно да го наруши принципот на слободна пазарна конкуренција, особено во делот на активата на компаниите. Како што и е познато на јавноста, целосен сопственик на ЕДС е ППЦ, фирма која има годишен приход од 12 милијарди евра, и актива со која повеќе од 10 пати се задоволени условите на повикот. Согласно членот 7 од Законот за енергетика, а во врска со членот 96 од Законот за јавните набавки, во вакви повици, дозволено е финансиската состојба на локалната компанија да биде поткрепена од мајката компанија, со што би се исполниле сите услови во повикот.
Оттаму, нашиот интерес единствено се однесува за правилна примена на материјалното право при спроведувањето на повикот. Сите правила на пазарната економија велат дека конкуренцијата во било која област конечно носи поволности за крајните потрошувачи, па така, исклучивоста или ограничувањето на конкуренцијата во овој повик, или погрешната примена на законските прописи, само би ја ограничило здравата конкуренција, спротивно на стандардите на ЕУ, а со тоа би спречила намалување на цената на електричната енергија за крајните корисници“, стои во дописот на ЕДС до јавноста.
Дали конкурентната понуда од ЕДС за многу пониска маржа од сегашната која е 11, 5 проценти, го загрозува монополот што еден снабдувач го има во делот на снабдување на домаќинствата и малите потрошувачи, па оттаму по секоја цена создава атмосфера да се оневозможи конкурентност на јавниот повик за универзален снабдувач?
Познавачите во енергетскиот сектор во постапката на јавниот повик препознаваат обид да се спречи грчката ЕДС да учествува на тендерот која ќе ја намали маржата на ниво значително во однос на актуелната.
Во еден од условите кои треба да ги исполнуваат компаниите стои дека фирмата треба да има добивка во последните три години. Сопственик на компанијата е регионалниот енергетски гигант Грчки ППС, кој има годишни приходи од близу 11 милијарди евра. Добро упатени извори коментираат дека причина за елиминација од јавниот повик не може да бидат долговите кои државните институции ги имаат кон ЕДС и дека апсурдно е компанијата која всушност ги кредитира државните институции со испорачана, а ненаплатена електрична енергија да биде ставена во неповолна положба.
Јавниот повик за универзален снабдувач за електрична енергија се објави на 11 декември, а ќе трае до 12 – ти јануари. За повикот интерес пројавија неколку фирми, а условите се построги во однос на претходниот од пред пет години.
(a1on.mk)
