Се предвидуваат ограничувања за снабдување со енергија на потрошувачите и наметнување посебни обврски за енергетските компании
Вонредна состојба поради енергетската криза прогласи Собранието на Косово, поддржувајќи ја одлуката на Владата за вонредни мерки за ограничување на снабдувањето со енергија, пренесуваат косовски медиуми.
За одлуката со која станува законска намалената дистрибуција на енергија гласаа 57 гласа пратеници, а 17 беа воздржани. Никој од присутните во салата не беше против.
Вонредните мерки ќе важат најмногу 60 дена, а опфаќаат ограничувања за снабдување со енергија на потрошувачите и наметнување посебни обврски за енергетските компании.
Одлуката предвидува формирање на итна техничка комисија за утврдување и поднесување препораки до министерот за економија. Комисијата има задача да препорача спроведување на мерки за справување со негативните ефекти од економската криза.
По препораките, Министерството треба да објави задолжителни рестриктивни мерки.
