Цената на производството на соларна енергија ќе падне за 50 проценти во текот на следните неколку години, кога придонесот на оваа технологија во глобалното производство на електрична енергија ќе достигне 8 проценти, што е за 2% повеќе од минатата година, предвидува Рамез Наам, водечки аналитичар специјализиран за прашања поврзани со енергетската транзиција.
Производството на соларна енергија во моментов руши еден рекорд по друг во различни делови на светот. Траекторијата надолу е сè уште во рана фаза, според Наам, поранешен компјутерски научник во „Мајкрософт“.
Штом придонесот на фотоволтаичниот сектор за глобално производство на електрична енергија ќе достигне 8 проценти, се очекува дека трошоците за производство на оваа технологија ќе се спуштат на ниво од околу 2,5 центи на KWh на најсончевите локации во светот, како Калифорнија. Трошоците за производство со фотоволтаици на северот на Европа може да се очекува да се спуштат на ниво од околу 4 до 5 центи на KWh, проценува Наам.
Тој предвидува скоро нула трошоци за сончево производство на најсончевите локации во светот до 2030 до 2035 година.
Глобалното производство на соларна енергија на крајот ќе достигне 19,2 TW, во далечна иднина, предвидува аналитичарот.
Меѓународната агенција за енергетика, во својот најнов извештај за Светската енергетска перспектива, предвидува производство на соларна енергија наскоро да порасне на годишна стапка од 16 проценти.
Цената на производството на соларна енергија падна за дури пет до осум пати во текот на изминатата деценија, во одредени делови на светот и за 350 пати во споредба со нивото регистрирано во 1979 година.
