Меѓу инвестициите во нови електрани од новиот инвестициски план на Република Србија, се издвојува изградбата на реверзибилните хидроцентрали (РХЕ) Ѓeрдап 3 и Бистрица кои можат да одиграат голема улога во енергетската транзиција, поточно во полесна интеграција на сончевата енергија и ветерни централи.
Плановите за изградба на реверзибилните хидроцентрали (РХЕ) Ѓердап 3, со капацитет од 2.400 MW и Бистрица, со капацитет од 680 MW, постојат веќе неколку децении. Во неколку наврати, странските инвеститори изразиле интерес за изградбата, но ништо конкретно не се случило. Инвестицијата во Ѓердап 3 е многу висока и се проценува на неколку милијарди евра, а во Бистрица на околу 600 милиони евра.
Реверзибилните хидроцентрали го решаваат проблемот со променливо производство на електричната енергија од ветерниците и соларните електрани. Овие електрани работат на принцип на пумпање вода од долниот резервоар или реката во горниот резервоар, од каде што водата се користи за конвенционално производство.
Реверзибилните хидроцентрали произведуваат врвна енергија и моќ за покривање на максималната потрошувачка во текот на денот, со други зборови, тие произведуваат најскапа енергија. Тие исто така се решение за варијабилноста на производството, кога има премногу енергија од соларните електрани и ветерници, таа енергија може да се искористи за пумпање вода во горниот резервоар, а кога нивното производство е помало, тогаш реверзибилните хидроцентрали можат да го компензираат тој недостаток и многу брзо да започнат со производство. Овие хидроелектрани делуваат како и капацитети за складирање енергија.
