среда, декември 7, 2022
spot_img
Повеќе

    Од утре ЕСМ ќе ги топли радијаторите во Скопје, потврди Бислимоски

    Утре ќе бидат топли радијаторите на сите скопјани кои се приклучени на централно греење зашто се исполнети сите предуслови за нормално започнување на грејната сезона од 15 октомври, најави претседателот на Регулаторната комисија за енергеетика (РКЕ) Марко Бислимоски. Тој рече дека лиценците за производство, снабдување и дистрибуција ѝ се доделени на државната ЕСМ. Бислимоски нагласи дека државата вложи големи напори илустрирајќи со фактот, како што рече, што во Белград грејната сезона ќе започне подоцна „иако знаеме со какви резерви на гас располага Србија“.

    Денеска донесовме три одлуки за вршење на енергетски дејности од делокругот на топлинската енергија. Лиценца за извршување на дејност регулирано производство на топлинска енергија до 30 април 2023 година доби ЕСМ продажба ДООЕЛ Скопје, лиценца за дистрибуција на топлинска енергија во траење од 35 години доби ЕСМ дистрибуција на топлина ДООЕЛ Скопје, а лиценца за снабдување со топлинска енергија во траење од 10 години доби ЕСМ снабдување со топлина, рече Бислимоски.

    -Со издавањето на овие лиценци се исполнети сите предуслови кои се потребни за започнување на грејната сезона во градот Скопје на 15 октомври со што греењето ќе започне од утре. Ќе важат и понатаму сите критериуми и параметри кои важеа од претходно, односно загарантираната температура ќе биде 21 степен Целзиусов, а ист како и претходно ќе биде и периодот на започнување и завршување на греењето, прецизира Бислимоски.

    Посочи дека во Белград и во Италија за една недела е одложено започнувањето на грејната сезона, а во повеќето земји максималната температура која се гарантира е 19 степени Целзиусови.

    Претседателот на РКЕ нагласи дека скопјани ќе имаат парно греење без разлика дали ќе работи ТЕ-ТО или не.

    -До 2012 година сите потреби на Скопје ги задоволуваа топланите Исток и Запад, а и од 2012 година кога беше вклучено ТЕ-ТО имаше подолги периоди кога не работеше когенеративната електрана, бидејќи не им одговараа пазарните услови при што немаше никакви проблеми во снабдувањето со топлинска енергија во град Скопје, рече Бислимоски во одговор на прашање.

    Сепак, потенцира, добро би било да работи ТЕ-ТО.

    -Пресметките се правени дека ТЕ-ТО ќе работи со 70 проценти во просек во текот на грејната сезона, а 30 проценти да се добиваат од топланите. Во октомври  и ноември не е проблематично од тој аспект заради очекувањата дека ќе имаме нешто повисоки температури од вообичаените. Затоа работењето или не работењето на ТЕ-ТО нема да создаде никаков проблем. Како што има трошоци признати за ТЕ-ТО така има и за набавка на природен гас. Верувам дека ќе се најде природен гас по разумна цена за да може и ТЕ-ТО да работи пред се за производство на електрична енергија која ќе им помогне на македонските компании кои се на отворениот пазар, а дополнително да помогне и за порелаксирана ситуација во снабдувањето со топлинска енергија, потенцира Бислимоски.

    НАЈНОВИ ВЕСТИ

    Струја