Лидерите на земјите од Европската унија ќе разговараат за зголемените цени на енергијата кога ќе се состанат овој месец, додека владите се обидуваат да ги заштитат домаќинствата од зголемените трошоци за гас и енергија.
Европските цени на гасот се зголемија за повеќе од 300% оваа година поради повеќе фактори, вклучувајќи го ниското ниво на складирање, прекини и голема побарувачка, исто така економиите закрепнуваат од пандемијата COVID-19, со што се зголемија трошоците за електрична енергија на големо.
Лидерите од 27-те земји-членки на ЕУ ќе разговараат за зголемувањето на цените кога ќе се состанат на 21-22 октомври, според нацрт-агендата за самитот, како што пренесуваат повеќе агенции.
Земјите на ЕУ се одговорни за нивните национални енергетски политики, а некои влади веќе интервенираа. Франција понуди еднократна исплата за посиромашните домаќинства, додека Грција планира субвенции за да им помогне на домаќинствата да ги платат повисоките сметки.
Некои земји повикаа на покоординиран одговор на ЕУ, Шпанија бара реформи на пазарот на електрична енергија во Унијата и предупредува дека високите сметки за енергија може да ја оштетат јавната поддршка за политиките за борба против климатските промени. Луксембург ја повика Европската комисија да го заштити внатрешниот пазар на енергија во ЕУ и да го заштити од потенцијални манипулации од страна на компаниите и да преземе итни чекори за да ги идентификува потенцијалните злоупотреби.
Група пратеници од Европскиот парламент овој месец побараа од Брисел да ја испита улогата на „Газпром“ во зголемувањето на цените на гасот во Европа, велејќи дека однесувањето на рускиот добавувач ги натерало да се сомневаат во манипулација на пазарот.
Брисел подготвува низа на мерки што националните влади можат да ги искористат за да одговорат на поскапувањата, како што е прилагодување на данокот на додадена вредност (ДДВ) за енергија.
Комисијата рече дека порастот на цената треба да ги охрабри земјите да се оддалечат од фосилните горива побрзо и да обезбеди поголем број граѓани да имаат пристап до прифатлива обновлива енергија.
