Стручњаците од МЕПСО работат интензивно на терен и веднаш по добивањето на прелиминарните сознанија ќе ги споделиме со јавноста, велат од компанијата
Формирана е работна група која треба да ги лоцира причините за прекинот во снабдувањето со електрична енергија по испадот во напонската мрежа што се случи во неделата во трафостаницата „Скопје 4“ во Пинтија, поради кој неколку општини во Скопје, делови од Велес и Овчеполието, четириесетина минути беа без напојување, информира АД МЕПСО. Групата, како што велат, е составена од стручни лица вработени во компанијата.
„Како што информиравме и во неделата, до прекин со напојување на поголем дел од градот Скопје дојде како резултат на исклучување на двата енергетски трансформатори во трансформаторската станица „Скопје 4“, како последица на дефект кој се појави на изолаторска верига на 110 киловолтниот далекувод кој ја напојува трафостаницата ‘Бунарџик’ преку ТС ‘Скопје 4’. Во оваа прилика појаснуваме дека во нормални услови кога настанува дефект на далекувод, за изолирање на настанатата грешка, заштитата и прекинувачот го исклучуваат далекуводот на кој се појавува дефектот, со што без напојување остануваат само потрошувачите кои се врзани на трафостаницата напојувана од конкретниот далекувод“, велат од АД МЕПСО.
Поголем дел од Скопје остана без струја, дефект во трафостаницата во Пинтија
Во моментот на дефектот, додаваат, поради грешка во секундарните кругови за напојување на опремата во ТС „Скопје 4“ се случи неселективност и за само 0,9 секунди проработија системските заштити во околните трафостаници на 110 киловолтно напонско ниво, а за 2,5 секунди се активираа заштитите на 400/110 киловолтните трансформатори во ТС „Скопје 4“.
„На овој начин се дава налог до прекинувачите да ги исклучат двата енергетски 400/110 киловолтни трансформатори, преку кои се напојува најголем дел од Скопје и околината. Во согласност со процедурата при дефект, дежурните екипи од АД МЕПСО веднаш извршија проверки и прегледи во ТС ‘Скопје 4’ и во координација со Националниот диспечерски центар при АД МЕПСО, започнаа постапка за вклучување на елементите од мрежата. Со напорна работа тие успеаја за еден час да воспостават напонска состојба и да се нормализира напојувањето на градот и околината“, појаснуваат од компанијата.
Паралелно со активностите кои се вршеа во ТС „Скопје 4“, прецизираат, далекуводните екипи на АД МЕПСО до доцните ноќни часови работеа на отстранување на дефектот на далекуводот 145/1 ТС Скопје 4-ТС Бунарџик, со цел жителите на Бунарџик, како и индустриската зона, да добијат напојување со електрична енергија.
„Во 3:35 часот, далекуводот 145/1 од ТС Скопје 4 до ТС Бунарџик беше поправен и вклучен под напон, со што се нормализираше напојувањето и на ТС Бунарџик. Она што и во оваа прилика сакаме да го потенцираме е дека технички проблеми на електромрежата од секаков тип можат да се случат секаде и во секој дел од денот и најважно во таквите моменти е што побрзо да се стабилизира системот, а граѓаните и стопанството да бидат снабдени со електрична енергија. Работната група работи интензивно на терен и веднаш по добивањето на прелиминарните сознанија ќе ги споделиме со јавноста“, посочуваат од АД МЕПСО
